Մեծարման ու պատգամահղման միջոցառում Մարտակերտում

 ԼՂՀ առողջապահության նախարարության հովանվորությամբ համակարգի ճյուղային արհմիությունների և «Ваши врачи» թիմի հետ համատեղ Մարտակերտում տեղի է ունեցել շրջանի բուժաշխատողների մեծարման հանդիսավոր արարողություն:

Հանդիպմանը ներկա են եղել Մարտակերտի շրջանի վարչակազմի ղեկավար Վլադիկ Խաչատրյանը, վաստակաշատ բժիշկներ՝ ծննդով Մարտակերտից, շահագրգիռ կառույցների ներկայացուցիչներ և շրջանի բուժհաստատությունների աշխատողները:

Միջոցառումը բացել է «Ваши врачи»  թիմի ղեկավար, Հանրապետական բժշկական կենտրոնի անեսթեզիոլոգիայի և վերակենդանացման բաժանմունքի վարիչ Լևոն Հայրապետյանը: Ցուցադրվել է տեսաֆիլմ Մարտակերտի շրջանային հիվանդանոցի անցած ուղու մասին:

Առանձնահատուկ ընդգծվել է ղարաբաղյան պատերազմի տարիներին վիրավոր ազատամարտիկների կյանքը փրկելու, հարյուրավորների վերստին մարտական շարք վերադարձնելու գործում հիվանդանոցի գլխավոր բժիշկ Սերգեյ Օհանյանի և ամբողջ բուժանձնակազմի դրսևորած սխրանքը:

Ներկայացվել է նաև հետպատերազմյան շրջանում հիվանդանոցի շենքի արմատական վերակառուցման և նորագույն սարքավորումներով հագեցման պատմությունը:

Հանդիսությանը Մարտակերտի շրջանի բուժաշխատողներին մեծարման ու շնորհակալական խոսք է հղել առողջապահության նախարարի առաջին տեղակալ Զոյա Լազարյանն ու նախարարի տեղակալ Կարեն Ղուկասյանը: Մի խումբ բուժաշխատողների հանձնվել են նախարարի կողմից տրված շնորհակալագրեր: Շրջանի մի շարք բուժաշախատողներ էլ շնորհակալագրեր ու նվերներ են ստացել ճյուղային արհմիությունից:

 «Ваши врачи»  թիմը իր դերասանական վարպետությամբ ու բարձրակարգ հումորով ներկայացրել են տարբեր ոճով հումորային ծրագրեր, դահլիճում ստեղծել տոնական տրամադրություն:

Ելույթներ են ունեցել վարչակազմի ղեկավար Վլադիկ Խաչատրյանը, բժիշկներ` Էդուարդ Ղուկասյանը, Աիդա Հարությունյանը: Բոլորի խոսքում շեշտվել է այն միտքը, որ ամե՛ն ինչ պետք է անել Արցախի հյուսիսային դարպասի» առաջընթացի ապահովման, ազգաբնակչության առողջության պահպանման համար:

Էդուարդ Ղուկասյանի «Սիրեցե՛ք ձեր հիվանդներին» պատգամն ուղղված երիտասարդ բուժաշխատողներին դահլիճն արձագանքեց ծափողջույններով:

Միջոցառմանը յուրահատուկ երանգ են հաղորդել Ստեփանակերտի մանկապատանեական ստեղծագործական կենտրոնի սաների երգն ու պարը:

Նմանատիպ միջոցառումներ կկազմակերպվեն հանրապետության մյուս շրջաններում:

Հարցեր, պատասխաններ, մեկնաբանություններ